20 ஆண்டுகளுக்கு முன்னர் தமிழீழ விடுதலைப் புலிகளினால் வெளியேற்றப்பட்ட வடக்கு முஸ்லிம்கள் இன்னமும் மீள் குடியேற்றப்படவில்லை என அவர் குறிப்பிட்டுள்ளார்.
யுத்தம் இடம்பெற்ற காலத்தில் தாமும் வெளியேற்றப்பட்டதாக அமைச்சர் குறிப்பிட்டுள்ளார். இதேவேளை, இன்னமும் 10,000 இடம்பெயர் மக்களே மனிக்பாம் முகாமில் தங்கியிருப்பதாக பிரதி மீள் குடியேற்ற அமைச்சர் விநாயகமூர்த்தி முரளீதரன் எனப்படும் கருணா தெரிவித்துள்ளார்.
வடக்கு கிழக்கைச் சேர்ந்த 650,000 இடம்பெயர் மக்கள் இதுவரையில் மீள் குடியேற்றியுள்ளதாகக் குறிப்பிட்டுள்ளார். நிலக்கண்ணி வெடி அகற்றப்படாத பிரதேசங்களில் உள்ள மக்கள் மட்டுமே இன்னமும் மீள் குடியேற்றப்படவில்லை என அவர் தெரிவித்துள்ளார்.
தமிழ்முசுலீம் மக்கள் தங்கள் வாழ்விடங்களை காப்பாற்றிக் கொள்ள கூட்டமைப்புக்கு வாக்களிக்க வேண்டும்!
சிறிலங்கா முசுலிம் காங்கிரசு வேட்பாளர்கள் ஆளும் ஐக்கிய மக்கள் சுதந்திர முன்னணியின் சின்னத்தில் போட்டியிடுகின்றார்கள் என்பதற்காக முஸ்லிம் மக்கள் ஆளும் கட்சியின் வெற்றிலைச்சின்னத்திற்கு வாக்களிக்கக்கூடாது. அது ஆளும் கட்சியின் கொள்கைகளை ஏற்று வாக்களித்ததாகக் கருதப்படும் நிலை ஏற்படும் என்று தமிழ்த்தேசியக்கூட்டமைப்பின் தலைவரும் திருகோணமலை மாவட்டப் பாராளுமன்றப் பிரதிநிதியுமான இரா. சம்பந்தன் புல்மோட்டை முஸ்லிம் கிராமத்தில் செவ்வாய்க்கிழமை மாலை நடைபெற்ற தேர்தல் பிரசாரக்கூட்டத்தில் பேசும்போது தெரிவித்தார்.
எமது மாகாணத்தில் தமிழர்களும் முசுலிம்களும் ஒருவரில் ஒருவர் தங்கி வாழும் நிலைதான் இருக்கின்றது. தமிழ் மற்றும் முஸ்லிம் மக்களின் வாழ்வும் தாழ்வும் ஒருவரில் ஒருவர் தங்கியதாகத்தான் அமைந்துள்ளது. அவர்களின் எதிர்காலம் அவர்கள் ஒற்றுமையாகச் செயல்படுவதில் தான் நிச்சயிக்கப்படும். இதனை உணர்ந்து இரு இன மக்களும் ஒற்றுமையாக செயற்பட வேண்டியது அவசியமாகின்றது என்றும் சம்பந்தன் தெரிவித்தார்.
தமிழ்த்தேசியக்கூட்டமைப்புக்கும் சுலங்கா முஸ்லிம் காங்கிரஸூக்கும் நல்ல புரிந்துணர்வும் தெளிவான விளக்கமும் உள்ளது. இரு இனங்கள் பற்றிய முக்கிய விடயங்களில் இரு கட்சியினருக்கும் முக்கிய புரிந்துணர்வு உள்ளது. என்றாலும் முஸ்லிம் காங்கிரஸ் குச்சவெளி பிரதேச சபைக்கான தேர்தலில் ஆளும் ஐக்கிய மக்கள் சுதந்திர முன்னணியின் சின்னத்திலேயே போட்டியிடுகின்றது. முஸ்லிம் காங்கிரஸ் தனது ‘மரம்’ சின்னத்தில் போட்டியிடவில்லை. எனவே முஸ்லிம் மக்கள் ஆளும் கட்சியின் வெற்றிலைச் சின்னத்திற்கு வாக்களிக்கக்கூடாது. தமிழ்த் தேசியக்கூட்டமைப்புக்கே வாக்களிக்க வேண்டும். அதன்மூலமே தமிழர்களும் முஸ்லிம்களும் தங்களின் வாழ்விடங்களை மற்றும் பிறப்புரிமைகளை காப்பாற்றிக்கொள்ளலாம் என்றும் சம்பந்தன் தெரிவித்தார்.
